Trenutno čitaš
Biljna ulja u službi ljepote

Biljna ulja u službi ljepote

Afrodita - Cherry Blossom
Afrodita - Cherry Blossom

Biljna ulja su jedan od najstarijih proizvoda za njegu kože, koji se koriste već vjekovima, a danas su sastojci sve popularnije prirodne kozmetike. Iako su često bila zanemarena, zbog razvoja moderne kozmetičke industrije, tokom posljednje decenije ponovo su u fokusu,  jer mnogi teže da pronađu prirodne kozmetičke preparata bez aditiva, koji su efikasni u njezi kože i kose, ali i pristupačni.

Foto: freepik

Mnogo je načina da koristiš ulja u svojoj beauty rutini, a ovo su samo neki od njih: možeš ih koristiti za skidanje šminke, njegu kože cijelog tijela, kao serum za lice, njegovati vrhove kose, koristiti kao masku ili tretman kose, za njegu kože oko noktiju, kao i za masažu.

Uloga ulja u njezi kože

Srednji sloj tvoje kože sadrži folikule dlake, krvne sudove, znojne i lojne žlijezde, koje su odgovorne za stvaranje ulja i održavanje kože mekom i hidriranom. Ovo ulje je poznato pod nazivom sebum i mješavina je triglicerida, masnih kiselina, voskova i drugih komponenti, koje podmazuju kožu i pomažu joj da zadrži vlagu. Nanošenjem ulja na tvoju kožu, dodaješ joj dodatni sloj zaštite, koji će takođe, zadržati vlagu na njoj. Kao dodatni bonus, određene vrste prirodnih ulja su bogate antioksidansima, koji štite kožu od slobodnih radikala i imaju antiinflamatorna i antimikrobna svojstva.

Bez obzira da li imaš masni ili suhi tip kože, postoji ulje koje možes da uvrstiš u svoju njegu. Najbolji način da ih koristiš je da ih umasiraš u vlažnu kožu, jer apsorbuju tek u kontaktu sa vodom. Gotovo je nemoguće izdvojiti samo jedno ulje, pa ćemo u ovom tekstu spomenuti nekoliko njih i osvrnuti se na njihovu upotrebu na koži lica.

Ulje lješnjaka

Ovo ulje je pogodno, ako imaš masnu i mješovitu kožu. Katehini i tanini, koji se nalaze u njemu, čine ovo ulje „suvim“, pa je ono odlično za regulaciju prekomjernog lučenja masnoća. Takođe, skuplja pore, što ga čini izvrsnim za tretiranje akni. Vrlo je nježno pa ga možeš koristiti i ako imaš osjetljivu kožu. Jedno je od rijetkih prirodnih ulja koje sadrži UV zaštitu, a takođe je i bogato antioksidansa.

Ulje avokada

Ovo ulje se smatra odličanim izborom za njegu svih tipova kože. Bogato je vitaminima A, D i E kao i linolnom i oleinskom kiselinom. Povećava proizvodnju kolagena, čini kožu glatkom, pa je idealno za njegu kože sa borama. Uklanja pigmentne mrlje, pjegice, oštećenja od sunca i regeneriše ožiljke. Pomaže kod stanja kože kao što su psorijaza i ekcem.

Foto: freepik

Ulje divlje ruže

Bogato je esencijalnim masnim kiselinama i sadrži vitamine E, C, D kao i beta karoten. Pomaže u zaštiti, hidriranju kože i smanjenju bora. Budući da je bogato vitaminom C, pomaže u posvjetljavanju tena, čineći ga ljepšim i podatnijim, te umanjuje hiperpigmentacije. Uz pomoć moćnih antioksidanasa iz svog sastava, sprečava oštećenja uslijed uticaja slobodnih radikala. Vitamin E i antocijanin u ovom ulju, odgovorni su za njegovo umirujuće dejstvo, zbog čega možeš da ga koristiš ako imaš rozaceu ili ekcem.

Foto: freepik

Ulje smilja

Ovo ulje je “čudotvorno” za kožu, jer je čini nahranjenom, gipkom i mekom, djeluje kao sredstvo protiv bora, mrlja i crvenila. Ulje smilja veoma je bogato antioksidansima, povećava proizvodnju kolagena i poboljšava mikrocirkulaciju kože. Ima antiseptički efekat na kožu, pa će umiriti upalne procese na koži što ga čini sjajnim sastojkom ako imaš masnu kožu. Takođe, pomaže kod suve, oštećene i iritirane kože, opekotina i modrica.

Pročitaj
Berina Hasanbegović

Ulje jojobe

Možeš ga koristi za sve, od akni, psorijaze do opekotina od sunca. Od svih jedinjenja koja se nalaze u prirodi, ulje jojobe je strukturno i hemijski najsličnije ljudskom sebumu, što znači da oponaša strukturu kože. Pomaže da se uspostavi balans proizvodnje sebuma i tako utiče na uklanjanje akni. U svom sastavu ima korisne minerale i hranljive materije, osim toga, djeluje kao emolijens za umirivanje kože i pruža joj cjelodnevnu vlagu. Takođe je odlična alternativa losionu za tijelo za one, koji imaju osjetljivu kožu.

Arganovo ulje

Bogato je vitaminom E, antioksidansima i esencijalnim masnim kiselinama. Dovoljno je lagano da se koristi u svakodnevnoj njezi kože, ali se takođe može koristiti za liječenje onih sa težim kožnim stanjima, kao što su ekcem ili rozacea. Zahvaljujući svojim antioksidativnim svojstvima, arganovo ulje poboljšava elastičnost kože, štiteći je od oštećenja slobodnim radikalima, ostavljajući kožu mekom i zaglađenom.

Foto: freepik

Mnoge  su prednosti upotrebe biljnih ulja u njezi kože lica, brzo se upijaju, obezbjeđuju joj trenutnu hidraciju, mekoću i štite je od oksidativnog stresa. Pored toga, izuzetno su povoljna u poređenju sa mnogim kozmetičkim preparatima za kožu na tržištu. Sljedeći put kada se nađeš ispred polica drogerije, ako do sada nisi, isprobaj neka od ovih ulja i pruži svojoj koži prirodan i zdrav izgled.

Kristina Blagojević

© 2024 Ultra Magazin. Sva prava zadržana. Play Team

Uslovi korištenja

Impressum